有Cosplay界一姐之稱嘅Enako熱愛ACG，好自然都鍾意打吓機，最近佢出席電視節目時就提到，自己平均每年都會花費近500萬日圓（約$34萬港幣）玩手機遊戲，仲話呢啲錢係答謝營運商苦心經營嘅感謝金...

人氣爆燈又勤力密密接Job嘅Enako，上次年收入就超過5000萬日圓，今年仲涉步埋寫真界，單喺8月就登上過15本雜誌封面，最近佢出席東京電視台節目「Downtown DX 」就提到自己有玩手機遊戲同埋會課金，而且過去呢兩年每年平均使咗500萬日圓（約$34萬港幣）。雖然對於年收入超過5000萬嘅Enako嚟講確實唔算大數目，但就令主持人非常驚訝，即時問佢點解會使咁多錢課金。

Enako就話雖然大部份遊戲都係免費，但明白開發同維運伺服器嘅成本好高，所以佢玩每一隻遊戲至少都會課金1萬日圓（約$680港幣），當作係對營運商嘅感謝。至於點解至少要1萬日圓呢，佢就解釋因為呢個價相當於一款單機遊戲嘅費用。

資料來源：oricon