《機動戰士高達》作為家傳戶曉嘅動漫作品，相信大家就算冇睇過都一定聽過——Btw你男人老狗冇睇過高達就真係…你有冇朋友架？——但原來有一部經典之作，就算係最資深嘅香港高達迷都冇真正睇過，而呢套就係1981年於日本上映嘅《機動戰士高達：劇場版》！好彩嘅係，時隔四十年後，呢部極具意義嘅作品終於喺香港首次上映啦！

《機動戰士高達：劇場版》其實都係以1979年開始播映嘅電視動畫版重新剪接，並加入部份重繪畫面而成，最終分成三部電影，於1981-1982年間於日本首次上映。而黎緊11月18日，香港就會上映第一集《機動戰士高達I：劇場版》。故事涵蓋動畫版頭13集劇情，亦即係由阿寶坐上高達講到阿寶與地球上嘅母親告別。

呢13集當中有唔少經典場面，包括開首嘅「高達立於大地上」，紅彗星馬沙登場，加曼「馬沙你暗算我！」，以及作為meme流傳於世嘅阿寶名句「你打咗我兩次，我爸爸從來都未打過我！」

《機動戰士高達：劇場版》之前從未於港台等地上映，今年九月就先喺台灣上映，黎緊11月18日就輪到香港。如果各位高達Fans想喺戲院重溫呢套經典，就唔好錯過啦。