有睇開《一拳超人》漫畫嘅朋友應該都知道村田雄介並唔係原作者，但多得佢推出重繪版本，大家先睇到依家畫得咁精細嘅《一拳超人》，同時亦因為完稿速度驚人又被網民稱為「作畫怪人」。已經停更咗幾個月嘅村田雄介，日前就話自己喺空閒時間整咗一條《一拳超人》短片，瞬間引嚟10幾萬人讚好，觀看次數更突破200萬。

噚日（22日）村田雄介就喺Twitter表示最近因為各種原因導致要停更，抱歉要大家等咁耐，不過就用空閒時間製作咗條動畫短片，於是就附上一條全程冇音效嘅《一拳超人》。

お待たせしております。となジャン版ワンパンマン、諸般の事情で最新話更新が滞っております。今しばらくお待ち下さい。空いた手で短編アニメなど作ってみました。ぜひご覧ください。 pic.twitter.com/ATUzfjsWzh

— 村田雄介 (@NEBU_KURO) September 23, 2021

雖然條片個故事非常簡單，只係講琦玉趕路去超市買特價高級肉，但就充滿《一拳超人》風味，琦玉喺路上飛奔穿梭河道、火車軌，期間亦不忘停低扶阿婆過馬路，幾經辛苦去到超市先發現特價肉已經賣晒，好彩嘅係徒弟積羅斯一早就買咗，最後兩人一齊返屋企。好多粉絲睇完都估唔到原來村田雄介除咗畫漫畫叻，就連動畫都畫得咁好，令人猜測佢係咪打算轉行做動畫製作。