每當韓國有電影票房熱賣，都會見到話係《與神同行》幕後製作班底，今次呢套《絕路狂逃》都唔例外，講明係同政治有關，90年代初非洲索馬里內戰打仗，南北韓兩國外交官由敵人角力到齊齊被困然後合力逃亡殺出一條血路，呢個故事聽落應該係幾火爆，導演柳昇完拍過《軍艦島》同《柏林諜變》，好此道者應知佢咩料。加上人強馬壯演員班底強勁，絕對唔係求其玩命飛車大叫「睇住呀！」之作品可比擬！睇睇預告就知呢套戲係極度緊張火爆觀能刺激又有人情味的政治動作片！

香港人無咩經歷過打仗，威極只是唔小心聞過下催淚彈！但係非洲每60分鐘就有一個人正受戰爭生存威脅，索馬里內戰由1991年爆發都而家都未完全停止，至今依然有不同程度武裝衝突。要講索馬里政治問題講十日十夜都唔完，只要講你知索馬里有阿爾蓋達基地組織，又係伊斯蘭國的地頭，唔駛講都知複雜得來梗有AK47同Toyota戰車份！今次呢套韓國片強在完全根據當年南韓駐索馬里外交官真實事件改篇。過去你未必明政治局勢如何一發不可收拾，點解可以一夜間變天然後馬上變為身陷地獄。經過呢幾年而睇埋阿富汗，相信唔難理解，唯願駐香港的外國大使館官員唔會有機會經歷一場《絕路狂逃》！

電影的背景好重要，除左一夜變天的環境仲有當時南北韓非洲的勢力拉鋸戰，唔講你未必知，1991年當時南韓尚未成為聯合國成員國，剛搞完1988年漢城奧運會的南韓急於展開全球化計劃想取得國際地位，積極拉關系想加入聯合國，當時南北韓都派大使去非洲拉票，因此呢部電影背景的時代就算無戰亂唔打到來都充滿外交同政治的火藥味！索馬里作為南北韓兵家必爭關鍵一票之國度，兩國鬥到難應分難解。不過一場革命一個內戰序幕，打破原先的政府拉鋸，兩個國家級大使因而共同合作，為生存而掙扎向前！要離開戰亂鬼國地獄就只能聯合原本的敵人，不理紅藍團結著草！相信應該好適合識得政治了解世界的大男孩入場感受！

講班底今次《軍艦島》《柏林諜變》導演柳昇完伙同一班實力演員包括 《1987:逆權公民》金倫奭 《金權黑幕》趙寅成《屍戰朝鮮》許峻豪 《屍殺半島》具教煥等主演，再加埋大大隻字宣傳《與神同行》《極限逃生》幕後班底重金製作！老老實實呢套戲明顯就睇劇情睇動作睇緊湊唔係睇女，所以花瓶女主角其實好像係沒有的！

故事劇情大綱係80年代尾，正值冷戰高峰期，南韓為加入聯合國四出進行游說工作，導致與北韓在非洲爆發外交衝突。1991年，在南韓駐索馬里大使館設立三年後，索馬里首都摩加迪沙陷入內戰，南北韓大使館外交人員同時面臨著被困當地險況。南北韓外交官在外界看起來不共戴天，但在戰火之下，他們都成為索馬里政府和反政府武裝份子的目標。兩國人員決定暫時放下分歧，冒著生命危險聯手展開驚心動魄的逃亡行動。