近年小米、OPPO等手機大廠誓要爭做「手機叉電領導者」，積極研發高功率無線快叉技術，當中小米早前更展示過120W無線快叉技術，成功喺15分鐘內叉爆一部手機，引起外界關注，但第時可能都通通冇得用啦！據外媒TechSmart報導，中國工信部打算從2022年1月開始，限制境內無線叉電裝置功率上限為50W，換言之OPPO同小米研發咗咁多年嘅技術，隨時得物無所用。

小米於今年5月展示過120W無線快叉技術，成功用15分鐘叉爆手機。

今年2月，中國工信部發表一份名為 《無線充電（電力傳輸）設備無線電管理暫行規定（徵求意見稿）》嘅文件，內容講述為避免高功率無線叉電裝置影響航空、無線電服務以及天文觀測等等，當局有意從2022年1月起，限制所有境內生產及進口銷售無線叉電設置，輸出功率唔可以超過50W，意味著小米、OPPO最新嘅無線叉電裝置都唔可以推出市面。

雖然上述規定正處於草案階段，預計仲要一段時間討論及修改，但對於追求無線秒叉嘅手機大廠嚟講，絕對係一個壞消息。