據日本媒體報導，隨住東京近日確診人數上升，日本政府將於7月12宣佈東京第四度進入「緊急事態宣言」，直至8月22日，亦即係完全覆蓋7月23日至8月8日舉行嘅東京奧運。消息指東京奧運應該唔會取消，但睇黎觀眾就冇得入場啦。

據日本《朝日報》報導，隨住夏天來臨及暑假，東京人出多咗街，東京都今日確診人數上升至920人，係自5月13日以來最高嘅數字。日本經濟再生大臣西村康稔指出當中有30%案例係來自傳染力更高嘅Delta變種，而目前全日本只有15%人口完成疫苗接種，所以唯有再次進入「緊急事態宣言」以控制疫情。

咁既然都「緊急事態宣言」，自然就冇辦法畀觀眾入場睇奧運。據知國際奧委會、日本政府等最快於今日舉行會議，以決定是否容許觀眾入場。

早前日本方面宣佈，容許每場比賽最多10000萬觀眾入場，不過入場人士要全程戴口罩、不准飲食、連大聲歡呼都唔得。後來亦有報導指日本方面希望將入場人數減到5000人。再早前，日本籌委會亦表示，已經做好唔畀任何觀眾入場嘅準備。

資料來源：Business-Standard