粵菜一直有分為三大流派，佢地分別係廣州菜、潮州菜以及東江菜，其中潮州菜靈魂為普寧豆醬及魚露，兩者都係最常用到嘅潮州菜調味料，同時潮州菜非常重視提升食材新鮮風味及海鮮鮮味。

而尖沙咀凱悅酒店主廚皓勤師傅祖籍潮州，近日佢就推出令人難以忘懷嘅潮州功夫菜，真係樣樣鮮味，款款見真章。

其中作為潮州菜代表之一: 水瓜蠔仔煮魚肚，精髓在於其雞湯底以輕輕煎香嘅鮮雞慢火熬製三個鐘，再用人手逐少將雞肉及雞骨搗碎融入湯底中，同時魚肚經過砂爆處理，質感軟綿掛湯一絕，而魚露同蠔仔就將成味菜提鮮一個層次。

而蝦乾春菜豆醬雞球煲、欖角梅膏骨及豆醬蟲草花撈凍魚飯亦都係值得你去試嘅潮州功夫菜，當然就唔少得潮州著名嘅糖醋煎麵，蘸點鎮江醋同砂糖食真係無得彈，最後再整番碗冰花綠豆清心丸，咁樣一餐潮州菜就真係完滿啦！