講起Rockstar Games，大家一定諗起《GTA》同《Red Dead Redemption》系列，而講起呢兩個系列，就不能不提當中極為精彩嘅故事。不過創作出呢啲故事、而且係Rockstars Games創辦人之一嘅Dan Houser於去年年頭就已經離開咗Rockstar Games，最近就被網民發現佢似乎開咗另一間遊戲公司。

據《GTA Forum》上嘅一名網民發現，Dan Houser喺6月23日註冊咗一間名為「Absurd Ventures in Games」嘅英國公司，而網民又順住「Absurd Ventures」呢個名，發現一間註冊於今年2月，名為「Absurd Ventures LLC」嘅美國公司。似乎就係Dan Houser離開Rockstar Games之後成立嘅新公司。

由於「Venture」有「投資」嘅意思，所以有人估計「Absurd Ventures」兼非一間遊戲製作公司，而係一間投資遊戲製作嘅公司。但另一方面「Absurd Ventures in Games」嘅註冊文件中就話佢係一間「開發預先做好嘅互動式休閒及娛樂軟件」公司，加上Dan Houser嘅銜頭係「製作人兼創意總監」，似乎又係一間遊戲製作公司。睇黎都要等到有進一步消息先能夠確認啦。

Dan Houser 與哥哥Sam Houser於1998年創立Rockstar Games，並開始為《GTA》系列撰寫劇本，久唔久亦會兼任埋製作人。同佢亦係《Red Dead Redemption》系列、《Max Payne 3》等遊戲嘅編劇，絕對係Rockstar Games嘅靈魂人物。不過喺去年2月，Rockstar Games母公司Take-Two Interactive就宣佈Dan Houser離職，而且冇公佈離職原因。而哥哥Sam Houser就繼續留任Rockstar Games製作人。