近年有唔少小行星掠過地球事件，幸好都只係掠過，並唔係直接撞落地球。最近NASA做咗一項模擬小行星撞地球演習，結果顯示以人類目前科技，除非有阿寶出現，否則完全無法阻止小行星撞擊地球。

雖然NASA演習入面嘅小行星無阿古捷斯咁大粒，但都足以造成巨大災害。

早前NASA同ESA（歐洲太空總署）展開一項為期一周嘅小行星撞擊地球演習，假設一顆距離地球3500萬英里（約5600萬公里），名為「2021PDC」嘅小行星將於6個月內撞擊地球。

（圖片截自：NASA）

據演習資料，小行星「2021 PDC」尺寸設定為35-804米，首次發現於4月19日，當時科學家預計小行星只有5%機率喺10月20日撞擊地球。演習第二日（模擬時間為5月2日），科學們重新計算小行星軌道後，發現「2021 PDC」極有可能撞擊歐洲或北非地區，科學家隨即研究各種方法阻止「2021 PDC」撞擊地球。佢哋曾經就打算發射核彈炸毀小行星，但因為核爆不確定性因素太多，所以否認方案，最終研判人類無辦法喺短時間內改變小行星軌道。

（圖片截自：NASA）

演習第三日（模擬時間為6月30日），「2021 PDC」預測軌道顯示將會撞擊東歐地區。演習第四日，科學家確認「2021 PDC」有99%機率落在東歐地區，並帶嚟相等於大型核彈嘅爆炸威力，唯一能夠做到嘅只係疏散撞擊區域民眾，盡可能減少傷亡。

（圖片截自：NASA）

為避免演習成真，NASA將於下半年展開防禦系列測試「DART」（Double Asteroid Redirection Test），準備發射一艘宇宙飛船撞擊一顆名為Dimorphos嘅小行星，藉此研究能否改變小行星軌道。

資料來源：businessinsider、NASA