卻說由於《Marvel》系列中，由Sebastian Stan飾演嘅「Winter Soldier a.k.a Bucky」自一出場就同美國隊長 (Steve Rogers飾) 充滿「基情」，所以有一部份Marvel認定佢係一名同性戀者。而早前完結嘅Marvel劇集《The Falcon and the Winter Soldier》中，又似乎有情節表示Bucky係一名雙性戀者，結果劇集導演就現身解釋，「大家諗多咗啦」。

圖片：IMDB

劇集第一集中，Bucky曾經與一名亞裔女子約會 (食餐飯咁啦)，席間Bucky就講到自己喺啲約會網站到不停見到老虎照片，「有一半時間我都唔知自己睇緊咩，超多」，而由於會喺約會網站上擺老虎相嘅主要都係男人，有觀眾就認為呢句對白係暗示緊Bucky對男人有興趣，但佢又約緊女喎，咁佢一定係雙性戀啦！

結果劇集導演Kari Skogland 接受訪問時就話，其實無論創作團隊定Sebastian Stan，都冇諗過句對白會係咁解讀，「我哋只係想表達件事 (好多老虎相) 有幾咁奇怪，而Bucky又有幾咁困惑。唔好忘記，佢今年已經106歲，所以成件事對佢黎講都係好難明。我哋想顯示Bucky欠缺現代技巧，而且不屬於任何一個群體。」

圖片：IMDB

至於有觀眾認為劇集後期，Bucky與「The Falcon a.k.a Sam」變得非常親密，似乎發展出超友誼關係，導演亦解釋，「去到最後佢哋的確係『愛』對方。一開始佢哋睇對方唔順眼，但到最後佢哋發展出『愛』對方嘅友情。我其實冇將男性嘅陽剛形象當係呢種『愛』嘅限制，又或者應該要點表現呢種『愛』。冇明確嘅性向，只係單純嘅『鍾意』。」