Switch上嘅《Monster Hunter Rise》出咗啱啱一個月，各位獵人應該老早就完哂所以劇情、升爆哂HR，一係就暫時棄Game等更新，一係就陷入無盡嘅「打雷神龍抽護石地獄」。不過隨住Capcom昨日公佈第一個DLC，各位獵人又有新嘢做啦！

Capcom於昨晚舉行線上發佈會，公佈今日 (4月28日)推出嘅《MH Rise》Ver2.0 更新內容，當中除咗老早就講明嘅「霞龍」及「首領火龍」之外，仲有「炎王龍」及「鋼龍」兩大古龍，以及「首領角龍」等「新」魔物登場。另外更新後嘅「首領」系列魔物 就唔再限於「百龍夜行」模式中出現，而係能夠以普通任務狩獵，對於刷裝黎講算係方便咗；百龍夜行任務就追加今集招牌魔物怒虎龍。

除咗新魔物同相應嘅新裝、新裝飾品之外，Ver 2.0亦正式開放HR 8或以上嘅獵人Rank，另外亦開放能極大幅提升遊戲體驗嘅功能「外觀裝備」，即係唔影響裝備技能及數值之下換鬼咗佢個樣——各位終於唔使再對住套極度礙眼嘅原角龍裝啦！

另外Capcom亦同時宣佈Ver 3.0更新會於5月底推出，都會有新魔物，同時亦會有新嘅結局動畫。