嗱首先講明，我知大麻喺香港係違禁品，但喺外國唔少地方，其實大麻及大麻製品都已經係合法化，亦即係當地會有合法嘅大麻產品出現，除咗煙、煙油，仲有補充劑、糖、飲品之類，而且仲有好多唔同嘅牌子，睇到人花多眼亂。所以，外國就有啲類似食評網嘅大麻產品評測網站出現，仲可能係一份荀工黎添！

圖片：截自CBD Oracle

大麻產品評測網站「CBD Oracle」日前就出Post請「兼職大麻食評員」，主要工作係不停去試不同嘅大麻產品，再喺個網站到寫返「食評」，基本上就同啲「Foodie」做嘅嘢一樣，而且年薪有成3萬美金，即係接近24萬港紙，以一份兼職黎講都可以話係高收入。

不過份工就唔係大家想像中，收免費Product寫幾隻字咁簡單，CBD Oracle指應徵者必須年滿21歲，住喺一個大麻合法嘅州份，而且身體健康兼且隔離鄰舍或者屋企人唔會介意你份工。另外呢個大麻食評員仲要對大麻產品嘅效用、歷史、術語以至基因有深入認識、食完仲要寫出一份普羅大眾都能明白而且有娛樂性嘅食評，所以對於文字創作以至出鏡拍攝影片都有一定要求。

而且睇黎呢份工係相當Chur，因為個Post仲寫明應徵者要有「每日吸食、使用大麻嘅體力及忍受力。輕度使用者並不適合」。不過人工唔錯、又有免費Product收、仲可以Work From Home，以一份工黎講似乎都幾唔錯。