相信大家讀中學嗰陣都有買過校服，當年套衫你哋又點處理呢？最近正值日本畢業季，再次掀起「制服處理」討論，由於日本高中按季節分別有三套制服，加上每套都唔似香港咁幾嚿水就有交易，所以朝日電視台專程訪問市民點樣處理退役制服。

齋藤飛鳥JK制服圖。

喺香港，我相信大部份人都覺得自己套校服唔靚，加上長年累月嘅使用痕跡（汗跡），再者套衫又唔係貴，所以九成人都無「制服處理」呢個煩惱，好多時都係掉入舊衣回收箱或者送比師弟師妹。

不過日本情況就有啲唔同，首先日本高中有三個學期，所以分別會有春季、夏季及冬服三套制服，比起香港多一套制服要處理。再者日本高中制服同香港比絕對唔平，根據節目資料顯示，一套制服售價約7,2520日元（約$5160港幣），加上盛載過唔少珍貴回憶，所以「制服處理」問題每年都困擾唔少日本人，掉又可惜、唔掉又要搵地方擺。

喺節目街訪環節入面，市民反應兩極，唔少人都表示反正都唔會再著，所以都係選擇會掉。亦有人表示套制服另具意義，就算唔會再著或許著唔落，都會選擇珍藏保管，隔幾年就會同朋友一齊拎返出嚟著去影相。

節目組就提出一個兩全其美嘅建議，叫大家可以將退役制服改成迷你版，畀公仔著上身，咁就可以保留回億得嚟，又唔怕會晒位。