華人世界入面有句說話叫「棒下出孝子，嚴師出高徒。」所以我相信大部人細個都食過唔少「滕條炆豬肉」，同埋被人鬧過「人頭豬腦」等說話。最近外國就有研究發現，小朋友被人體罰同鬧得多，或會影響腦部發育。家長鬧得「人頭豬腦」多，小朋友分分鐘真係會變做「豬腦」。

一份刊登喺《Development and Psychology》期刊嘅研究顯示，家長教育方式同小朋友腦部發育有莫大關係。加拿大蒙特利爾大學 (Université de Montréal) 同史丹福大學(Stanford University) 共同做咗一項對研究，探討家長教育方式對小朋友腦部發育影響。研究團隊引用CHU Sainte-Justine兒童醫院自2000年起開始監測嘅兒童數據，每年對2至9歲兒童進行評估，記錄低佢哋所受到嘅教育方式同焦慮程度，並喺佢哋12至16歲嗰陣進行磁力共振掃描（MRI）及焦慮程序分析。

研究結果發現，受到嚴苛教育嘅青少年，大腦嘅「前額葉皮質」同「杏仁核」體積會比較細。呢兩個大腦區域主要用嚟調整情緒同焦慮，換言之小朋友細個被人鬧同打得多，會導致大腦調節情緒位置萎縮，從而增加患上躁鬱、抑鬱症等精神疾病風險。

研究負責人、加拿大蒙特利爾大教授Sabrina Suffren表示，長期被人鬧嘅小朋友雖然無造成任何物理上嘅傷害，但會嚴重影響腦部發育，所以希望家長同社會知道嚴苛教育方式會影響小朋友成長，而且當小朋友情緒調節出現問題，同時會影響埋學習力、創意力、記憶力。唔知大家覺得呢個研究準唔準確呢，有無朋友係細個被屋企人鬧同打得多，搞到依家脾氣唔好？

資料來源：neurosciencenews、Development and Psychology