時隔八年，《新・福音戰士劇場版 :│▌》喺粉絲萬眾期待之下敲定下個月上映，雖然導演庵野秀明實牙實齒話今次呢套電影將會喺成個EVA系列嘅最終章，不過就算係咁，EVA呢套經典作都都將會以二次創作嘅形式繼續存活。每個原創者對於二次創作嘅接受程度都唔同，而庵野秀明聲稱佢理解，不過喺12月28日當大家仲紛紛討論緊電影預告之際，庵野秀明嘅工作室「Studio Khara」就喺twitter發出聲明，希望EVA嘅fans進行二次創作嘅同時都會遵守一啲官方指引。

『エヴァンゲリオン』シリーズのファン創作物の公開に関するガイドライン を公開しました。

安心してファンアートなどを制作していただくためのルールですので、ぜひご確認の上、創作活動を楽しんでください。https://t.co/ozxAaO4hEv#エヴァンゲリオン#エヴァ

— 株式会社カラー (@khara_inc) December 28, 2020

截圖自：khara.co.jp

火上加油係，就係Khara發出官方指引嘅隔日，一位以畫EVA靈魂角色「綾波零」出名嘅同人畫家Mogudan (@mogudan555)突然宣布封筆唔再畫綾波零嘅同人畫。Mogudan嘅作品一向都比較大膽火辣，正正就係指引入面禁止嘅內容。佢話會繼續畫其他動漫角色嘅同人畫，不過就聲明就算係指引範圍內嘅網站都唔會在發表任何綾波零嘅作品。雖然佢冇特別話封筆原因係因為「Studio Khara」嘅指引，不過因為時間相近，又完全冇先兆，唔少人都覺得冇可能係巧合。

pic.twitter.com/sgREJnLbev

— モグダン@ヾ(´･ω･｀)ﾉ (@mogudan555) December 29, 2020

Mogudan由1995年已經開始發表綾波零嘅同人圖，到而家已經累積大批粉絲，甚至將佢筆下嘅綾波零稱為「モグ波」（Mogu波）所以今次封筆搞到唔少佢嘅支持者都將矛頭指向Khara。 而工作室似乎都抵受唔住fans嘅怒火，就係今日（12月30日）下晝再次喺Twitter再次發出補充聲明，話明白二次創作嘅活動喺嚟自大家對作品嘅喜愛，更加強調佢哋本意唔係為咗禁止fans嘅二次創作，只係希望立啲基本指引幫助fans可以安心享受二次創作。 雖然呢條補充頭盔味重，不過佢哋都依然企硬冇修改任何一條指引。 

Mogudan作品一向大膽

（截圖自：twitter @mogudan555）

二次創作係動漫圈子一向都非常普遍，有好多官方故事實現唔到嘅遺憾同ff，粉絲都鍾意用唔同形式嘅二次創作去圓滿。無論係fan fiction（同人文）定係同人漫畫，同人圖，甚至專門將唔同二次創作合輯再出售嘅「同人誌」，一直都係動漫文化好重要嘅一環。 雖然二次創作喺出自於對角色同原著嘅愛，不過原創始終都有權利保護自己嘅作品，至於fans受唔受就係另外一回事喇。