Lego除咗好巉腳之外，另一個最大特色就係佢咩都砌到，實際上Lego公司推出嘅Lego組合，亦涵蓋幾乎所有你諗到同諗唔到嘅類別，但你又知唔知有一個類別，係Lego唔敢出，出咗都會火速回收嘅呢？答案就係同現代戰爭有關嘅載具。

圖片：Lego

由於Lego主要係畀小朋友玩，而Lego公司又覺得「小朋友係唔應該接獨戰爭呢啲咁暴力嘅嘢」，所以歷年來都冇出過同現代戰爭有關嘅套裝。唯一一次，就係今年夏天推出美軍同日本自衛隊用嘅「V-22魚鷹式傾轉旋翼機」，結果被人鬧到火速下架 (令少數賣咗出去嘅炒價急升)。但你可能會諗，「我都玩Lego、我唔係細路，咁如果我想砌啲戰爭主題Lego又可以點呢？」答案就係「Brickmania」啦。

圖片：Brickmania

Brickmania由原Lego認可大師Dan Siskind創立，主打軍事主題嘅Lego組合、人仔、配件之類。網站上嘅作品包括一戰時英國嘅「厭戰號戰艦 (HMS Warspite)；二戰時嘅美國「雪爾暴坦克」、「P-39空中眼鏡蛇」、德軍嘅「Ju88轟炸機」；到現代嘅俄羅斯Ka-50攻擊直升機等。簡單啲黎講就係去填補呢個由Lego公司主動忽視嘅市場。由於Dan Siskind本身都係軍事迷，結合佢出色嘅砌Lego經驗，佢嘅設計比一般Lego自家出品更貼近現實，深受鍾意軍事主題嘅Lego迷喜愛。

圖片：Brickmania

但由於Dan唔能夠向Lego直接訂購零件，所以佢必須要買市面上嘅Lego套裝，又或者用網上平台買二手件，先可以儲齊件黎砌呢啲軍事載具，所以價錢都唔平，閒閒地都二、三百美金落樓，貴嘅更加可以去到過千美金。另外佢亦推出改裝Lego人仔以及大量配件，以滿足所謂「Adult Fans of Lego (AFOL)」嘅需求。假如大家都有興趣，就可以去佢哋哋官網睇下啦。

資料來源：Brickmania