來自盧森堡嘅Tsume-Art旗下嘅High Quality Statues (HQS)系列，推出以《龍珠》中悟空首次對上比達時嘅經典「鬥波」場面為藍本嘅兩座1/6雕像！

圖片：Tsume-Art

原作中，悟空練成界王拳自地府返回後，就與比達展開一場激戰，當比達被悟空以三倍界王拳壓倒後，就決定跳上半空使出「沖天炮 (ギャリック砲)」，意圖將悟空連埋成個地球一齊打爆，而悟空就使用龜波氣功抵擋，成為《龍珠》其中一個著名嘅「鬥波」場面。而Tsume-Art HQS嘅兩組雕像，就係重現返比達與悟空鬥波時嘅景況：身穿撒亞人戰鬥服、被紫色光輝包圍嘅比達咬牙切齒，面上身上都掛滿傷痕，甚至連手套上嘅血跡亦有重現。另外亦有內藏LED燈嘅手部更換部件及額外特效部件，令氣勢進一步上升。

圖片：Tsume-Art

而悟空版就被界王拳嘅紅光所包圍，身上同樣佈滿傷痕，甚至連面上嘅汗珠都還原。加LED燈嘅手部更換部件就為雕像添上龜波氣功嘅藍白光，同樣劇力萬鈞。

值得留意嘅係，由於地台嘅關係比達版 (66cm x 37cm x 45cm) 係比悟空版 (37cm x 44cm x 50 cm) 要高得多，同時售價亦係比較貴 (849歐元 vs 699歐元)。不過講真，呢Set嘢買得一個就要買埋第二個架啦，加埋HK$14,150左右啦。預計2022年上半年出貨。

資料來源：Tsume-Art