8月時同大家報導過，因為疫情影響，SEGA將關閉秋葉原地標之一嘅「SEGA秋葉原2號館」。估唔到黎到近日，有關SEGA嘅壞消息就接踵而來。首先全面出售遊戲機中心業務，然後再宣佈裁員650人、高層減薪，似乎都真係去到危急關頭啦。

圖片：Wikipedia

首先係11月4日時，SEGA系母公司「SEGA颯美控股」宣佈將旗下經營遊戲機中心業務嘅SEGA Entertainment嘅85.1%股份，出售予主要經營夾公仔機業務嘅GENDA。出售過後雖然都會保留「SEGA」嘅名字，但全日本近200間SEGA遊戲機中心都會交由GENDA管理，並相信會進行一番整頓。而SEGA自己就會集中於街機遊戲嘅研發及製作。

圖片：https://www.sega-entertainment.jp/

而除咗出售機鋪業務，SEGSEGA颯美控股於今日公佈年中財政報告，表示錄得217億Yen虧損，而去年同期係賺9.8億Yen，即係財務表現倒退三倍有餘。為咗節省成本，SEGA颯美控股宣佈餘下財政年度高層減薪30%，並希望搵到650位員工自願離職 (約佔總員工人數7%)。

SEGA准許員工於今年聖誕節前決定是否自願離職，而且會提供「肥雞餐」及再就業協助。