喺整個手提電話市場所有機都越黎越似樣、大家都係你抄我、我抄你、我又抄返自己嘅情況下，LG可以話係唯一嘅清泉，正如早前推出嘅LG Wing玩轉Mon有用得黎辨識度又高，實在係不可多得嘅嘗試。而最近又有傳佢哋會推出另一部極有新意嘅電話，就係「Project B Rollable Smartphone」。

圖片：《Letsgodigital》

大家記得早排LG出咗部捲Mon電視嗎？呢部「Project B(代號名稱)」基本上就係用上同一技術，亦係上年同期已經有傳聞會推出嘅捲Mon概念機嘅進化版。呢部捲Mon機內藏可以向兩邊拉開嘅伸縮結構，拉開之後亦會帶動捲Mon有如聖旨一樣打開，令螢幕面積變大一倍。而更巧妙嘅係兩邊支架可以獨立打開，換言之你會有「一個Mon」、「個半Mon」及「兩個Mon」三個螢幕大小選擇，方便唔同時間使用。你問實際上有咩用？我都未諗到，但至少比起摺Mon機更有彈性先啦。

圖片：《Letsgodigital》

據《Letsgodigital》報導，相關專利早於上年8月就已經向USPTO  (美國專利及商標局) 提交，於今年9月24日公佈，亦都已經向世界知識產權組織登記，目前未知LG係咪真係會將Proejct B正式投產。《Letsgodigital》亦按照LG提交嘅文件，用電腦畫咗呢部「Project B」出黎，睇落就非常吸引啦！