阿聯酋成功於香港時間20日早上6時左右，於日本種子島發射火箭。火箭上搭載嘅「希望號」火星探測器預計將於2021年2月進入火星軌道，將會研究火星嘅大氣層及氣候。

希望號探測器由阿聯酋當局與美國多間大學合力研發，總預算為2億美金，而送希望號上太空嘅火箭，就係由日本三菱重工研發嘅「H-IIA F42」火箭。火箭於發射後一小時成功與希望號脫離，而希望號就會用7個月時間到達火星，期間需要多次以推進器修正軌道。假若成功進入火星軌道，希望號會開始分析火星大氣中氧氣及氫氣含量，以了解火星嘅大氣結構，同時亦會充當火星嘅天氣衛星，監察火星表面的沙塵暴及冰雲，以及了解日常天氣及季節轉換。

圖片：mbrsc.ae

希望號除咗有科研任務，對阿聯酋黎講亦有政治任務，事關2021年12月就係佢哋建國50年，而政府亦想推動高科技工業，所以希望以「希望號」啟發新一代對科研嘅興趣。除咗希望號，阿聯酋當局亦會於2022年進行一個月球任務，長遠目標更加係2117年將人類送上火星。

值得一提嘅，由於近日係地球與火星於26個月以來最接近嘅日子，所以多個火星任務都集中於近日進行。中國「天問一號」預計於23日發射，而NASA亦會於近日發射火星探索車，尋找火星生命的痕跡。

資料來源：The Verge、Forbes、mbrsc