《食戟之靈》（日語：食戟のソーマ）係附田祐斗原作、佐伯俊作畫，煮食研究家森崎友紀協力製作嘅日本漫畫，於《週刊少年Jump》2012年第52號開始連載。《食戟之靈》曾經喺「全日本書店員評選推薦漫畫作品2014」裡面15部年度最佳作品中排名第三，開頭嘅人氣喺料理漫畫中的確係一時無兩，但後來唔少讀者都覺得《食戟之靈》嘅劇情同設定都愈來愈崩壞，所以繼續支持嘅讀者都愈來愈少，唔知係咪因為咁，所以《食戟之靈》喺6月3日發售嘅《週刊少年Jump》27號上宣布，3話之後就會完結，被腰斬嘅可能性似乎相當之大！

不過喺宣布3話後完結呢個消息嘅同時，《週刊少年Jump》亦有講《食戟之靈》會「同步發表重大消息」，有人估可能會同《銀魂》一樣，換個方式繼續連載，因為如果故事唔繼續落去，無論係突然中斷定係爛尾，都非常尷尬。但實情係點，始終都要等到3話後大家先知曉。