尋晚法甲榜首巴黎聖日耳門3:1擊敗摩納哥，再加上聯賽次席嘅里爾和波，最終呢個賽果令PSG提前5輪奪得聯賽冠軍。而擊敗摩納哥一戰，除左令PSG提前奪得聯賽冠軍之外，亦都係尼馬復出一戰。不過，今場真正搶鏡嘅卻並唔係尼馬，而係其隊友麥巴比。

麥巴比面對舊主摩納哥，可以話交出自己最佳表現，全場攻入三球，但為左尊重前東家佢拒絕任何慶祝動作，都算係有情有義。

而麥巴比三個入球唔單止展示其出色嘅入球能力及跑位，其恐佈嘅速度亦再一次向所有球迷展示，講緊嘅恐佈程度係甚至已經超越短跑王者「閃電」保特。

今場比賽麥巴比嘅第一個入球，佢由中路分球去左路比隊友後，由中圈全速爆seed直奔禁區，然後接應隊友嘅傳中後成功射破對方門將嘅十字關，為球隊率先帶黎領先。而呢個入球可以話完全展示麥巴比嘅超級速度，佢由中圈加速反超摩納哥嘅後衛率先殺入禁區，進而製造呢個入球。

咁究竟麥巴比呢球跑得有幾快？據拍得嘅片段分析，據指麥巴比由中圈加速後嘅速度達到23.61mph，亦即係每小時38km，要知道呢個速度竟然係比短跑王者「閃電」保特打破100m世界紀錄9.58s更快，因為保特當時嘅平均速度只係23.35pmh(每小時37.58km)。

不過，保特嘅最高速度則達到27.79pmh，亦即係每小時44.72km，呢個高度則係麥巴比未能夠企及嘅位置，但卻足以證明麥巴比嘅短程爆發速度究竟有幾恐佈。正所謂天下武功唯快不破，麥巴比嘅速度係一眾後衛嘅惡夢，因為佢真係可以一下就將你放甩，然後帶黎入球。