C朗全場入球精華

33歲之齡仍然可以以1億歐元轉會，可以說明祖雲達斯有幾咁睇重C朗拿度，甚至認定佢係呢幾年球隊嘅絕對核心。不過，從皇馬轉投祖記出戰左3場聯賽，C朗卻未能取得一個入球，令球迷開始為佢擔心。

黎到聯賽第四週面對薩斯索羅嘅比賽，C朗終於等到機會，佢終於搵到佢加盟祖記嘅第一個入球！

View this post on Instagram

Sono molto felice di aver segnato la mia prima doppietta con la maglia della Juve e soprattutto di aver contribuito a questa importante vittoria della squadra!

A post shared by Cristiano Ronaldo (@cristiano) on Sep 16, 2018 at 9:04am PDT

比賽下半場第49分鐘，祖記獲得一個角球機會，戴巴拿左腳內彎斬中，中堅邦路斯右腳將個波勾向門前，薩斯索羅後衛費拉里唔知係咪心急得濟，想用頭搥回個波比門將，但由於位置太近，再加上個波頂左落門柱，最後岩岩好撞落企喺門前嘅C朗腳下，佢輕鬆一撞就成功破網，攻入自己加盟祖記後嘅第一個入球！

攻入呢個咁具紀念價值嘅入球，C朗當然用上佢最鍾意嘅慶祝方式啦！

而正所謂好事成雙，喺比賽64分鐘祖記獲得一次快速反擊嘅機會，安利簡恩喺中場圈位置一直帶球推進，其後眼見左邊C朗拿度不斷高速突入禁區，順利成章分比對方，而已經攻入一球嘅C朗右腳一攞，左腳一射，皮球直線飛向遠柱，門將連撲嘅機會都無，令C朗拿度成功取得效力祖記嘅第一個梅開二度。

睇番數據，C朗取得祖記第一個入球一共花左320分鐘，並用上28次射門先換來。不過，取得第二個入球就只係相隔左15分鐘左右，明顯攻入第一個入球後，C朗正式解除未能取得入球嘅心魔，唔再心急，做番往日嘅自己，亦即係話最恐佈嘅C朗將會再次轟炸意甲另外19支球隊了！