全場上陣48分鐘，24投12中，三分球8投3中，罰球11罰8中，取得35分15籃板9助攻2封阻8失誤，正負值+8，以上係LeBron James今日喺東岸決賽搶七大戰中面對塞爾特人嘅數據。你無睇錯，LeBron喺比賽無加時嘅情況下，打足48分鐘，亦即係全場1秒都無喺後備席待過下，成功帶領騎士再次殺入總決賽，同時亦都係James本人連續第8年殺入總決賽。

全場打滿48分鐘呢個真係非常困難嘅事，雖然佢地作為NBA嘅星級球員，體能上好過常人好多，但係要打足全場每一分鐘，而每一分鐘有多個回合，來回跑動再加上NBA級別嘅強度，每一秒鐘你都唔可以分神，所以無論係體能定係精神上一場比賽都有住非常大嘅消耗。

究竟咁樣打足全場有幾攰？作為超人一樣嘅LeBron，喺賽後準備頒發東岸冠軍獎盃前，一眾騎士球員都企喺度慶祝，唯觸LeBron一人坐喺地休息，其表情亦都係攰到郁唔到一樣，真係睇見佢都覺得好攰。

當然，LeBron並唔係因為呢48分鐘令到佢攰成咁，佢今季常規賽打足82場比賽，場均上陣36.9分鐘，亦即係今季常規賽總上陣時間超過3000分鐘。然後去到季後賽，同溜馬打足7場，再同速龍打4場，跟住再同塞軍打7場，合共18場，場均超過41分鐘，總上陣時間為743分鐘，亦即係話今季黎到今日佢一共上陣左100場比賽，上陣時間達到3700多分鐘！

而令LeBron去到咁嘅環境，全因為一眾隊友今季非常不給力，大部份都狀態低迷，係久唔久先有一場交到功課，所以變相令LeBron只可以每場都拼盡，休息時間極少。

雖然係咁，不過LeBron成功換黎連續第8年殺入東岸決賽，呢一個成就係唔少人喺季後賽前都唔睇好的，因為佢地都認為騎士今季狀態太差，要再次打入總決賽非常困難。而LeBron成功超越極限，差唔多可以話以一人之力將騎士帶入總決賽。

計埋2007首次帶領騎士殺入總決賽，LeBron一共9次參加總決賽，除左湖人及塞爾特人曾分別31次及21次打入總決賽之外，就只有76人及勇士都係9次打入總決賽，所以LeBron一人9次參加總決賽已經比另外26支NBA球隊為多，真係一個非常誇張嘅成就呢！