尋日凌晨，相信唔少球迷都見證住皇馬連續三年奪得歐聯冠軍，雖然當中存在充滿爭議性嘅地方，但係結果已定。而C朗拿度雖然喺決賽中表現未見突出，但係佢作為世界最出色嘅球員之一，除左球技了得之外，其完美身型可以話係女人見到流口水，男人見到妒忌死。不過，喺咁完美嘅身型下，當然唔係坐喺度就可以得到的，而係C朗用不懈嘅努力換番黎的。

現年33歲嘅C朗拿度，雖然理論上身體已經過左巔峰期，而實際上亦都唔再好似年輕時速度咁高，但係佢喺門前嘅把握力同威脅就好似更上一層樓。日前佢更加揚言自己嘅身體只有23歲，所以佢希望自己可以踢至41歲，而當中令佢能夠保持絕佳狀態嘅關鍵有三：健身、休息及健康飲食。

能夠保持咁完美嘅身型，身體嘅訓練C朗拿度當然唔會掉以輕心，佢會喺皇馬訓練中心或家中每日至少健身3小時。不過能夠令C朗嘅腿部肌肉咁發達，能夠跳躍咁恐佈嘅高度，靠嘅並唔係普通嘅健身，而係Pilates。

I love this exercise

A post shared by Cristiano Ronaldo (@cristiano) on Nov 24, 2016 at 11:02am PST

Pilates係一套鍛鍊腹背核心肌肉同其他重要肌肉嘅運動，佢可以配合綁帶、彈簧等輔助工具進行，令訓練時嘅阻力更大，從而肌肉獲得嘅力量就會更多。

而除左訓練之外，休息亦都非常重要，C朗每日至少都會訓8個小時，不過咁長時間嘅休息都係值得的，因為佢可以令C朗從每日超高強度嘅訓練中回復過來，呢一點亦都係令佢比其他球員更出色嘅地方之一。

另外，C朗喺2013年安裝左一部液態氮轉化氣態氮機比佢舒援身體嘅疲勞，機器內溫度會喺-110度至超過-130度，而C朗只可以喺當中3分鐘左右，但呢短短3分鐘就可以令佢身體得到巨大嘅回復。

飲食方面，C朗絕對唔會飲酒的，同時佢對食物嘅脂肪同糖含量都有嚴格規定，絕對唔會比自己攝取過多不必要嘅食物。

就係憑住以上多方面嘅配合，C朗至今先可以繼續保持咁出色嘅表現，單份保持對身體嘅自律已經非常唔簡單，所以幾時都話從來無身型唔好嘅人，有嘅只係懶惰嘅人。唉，又係時候去諗下做Gym啦....起碼要諗下啦...