【轉會無至境】艾比奧(Abreu)生涯效力26支球隊創世界紀錄！

文：MenClub 波特先生　　圖：互聯網
POSTED ON 10 Jan 2018

艾比奧(Sebastian Abreu)呢位球員你可能唔太認識，佢唔係咩超級球星，又唔係咩年輕妖人，佢宜家只係一名已經41歲，即將面臨退役嘅老將，但係佢就有一個其他巨星可能望塵莫及嘅紀錄，就係生涯曾效力26支球隊！

喺2017年12月底嘅時候，艾比奧轉投智甲嘅奧達斯，成為其生涯第26支效力嘅球隊，而這亦都打破左健力士世界紀錄，令佢成為足球史上效力最多球隊嘅球員。

唔好睇艾比奧係一名球壇浪人，其實佢曾經係烏拉圭國家隊嘅重要球員之一，佢喺1996-2012年期間曾為國家隊上陣70場國際賽事攻入26球，其中包括烏拉圭喺2011年奪得嘅美洲國家盃冠軍，所以佢絕對算得上係蘇亞雷斯等人嘅前輩。

今次艾比奧係打破左以往由現年44歲嘅德國門將Lutz Pfannenstiel所保持嘅紀錄，後者生涯曾效力多達25支球隊。

艾比奧雖然生涯無效力過咩大球會，但係亦都曾經喺歐洲征戰，其中包括效力過西甲嘅拉科魯尼亞及皇家蘇斯達，而喺南美則效力過河床、保地花高、甘美奧等勁旅。

而要數艾比奧生涯最重要嘅時刻，相信必定係2010年世界盃8強面對加納，喺雙方打成平手需要由12碼決勝負嘅時候，艾比奧負責主射最後一輪，最終佢以一記chok射帶領烏拉圭殺入4強，奪得當年嘅殿軍。