【激戰！】Mayweather vs McGregor世紀之戰宣傳片熱血登場！

文：MenClub Mr.波特　　圖：互聯網
POSTED ON 10 Jul 2017


拳擊界一場萬眾矚目嘅世紀之戰：Mayweather vs McGregor，即將喺今年8月26喺賭城拉斯維加斯上演，其中焦點當然落喺40歲嘅「不敗拳王」Mayweather身上，呢位拳王由出道到宜家已經49連勝，如果能夠擊敗McGregor嘅話，咁佢生涯就可以達成50場比賽全勝紀錄，屆時預計佢可以真真正正咁退役。而有關今場世絕之戰嘅首段官方宣傳片亦正式出爐，睇見都真係好熱血，可唔可以快啲開打呀！

今場世紀之戰嘅價值預計將可以達到5億美元，勝方當然可以獲得巨額獎金，但係就算係輸個方都將可以獲得相當可觀嘅收入。不過，較早前有關今次比賽嘅形式已經公佈，就係以拳擊方式而唔係用終極格鬥方式黎進行，所以較年輕作為終極格鬥選手嘅McGregor將會落於較為不利嘅局面，其慣用嘅鎖技、腿部動作等全部唔可以用，全場就只可以用雙手出拳。因此，外界都已經一面倒認為Mayweather將好大機會刷新自己嘅連勝紀錄。

為了令人更關注自己，McGregor亦喺個人社交平台發內了一段有關自己嘅訓練影片，並且配上相當具挑釁意味嘅文字：「如果佢想死，就由佢死啦！」

其實McGregor並唔係無機會打贏Mayweather的，佢後生過Mayweather12年，年輕力壯擁有更強嘅體力，如果打持久戰應該更有利。當然，McGregor一定要克服全場比賽只可以出拳黎擊倒對方，佢必需提升自己嘅出拳力量，以及增加出拳嘅套路。另外，佢亦都要避開Mayweather嘅拳頭，雖然拳擊所用嘅拳套較終極格鬥用嘅拳套盎司更大，但係相對佢地因為單以拳頭作為武器，所以佢地嘅拳頭威力都較終極格鬥嘅選手強得多，隨時McGregor唔小心中左Mayweather一拳就會倒地不起啦。

距離正式比賽日仲有1個月時間，雙方目前都傾盡全力訓練，其中Mayweather最需要提升嘅係比賽狀態同體能，因為佢自從2015年9月後就無再參加過比賽。而McGregor目前當然就梗係要適應拳擊比賽規則，如果唔係打打下突然見到佢出腳或者用鎖技就搞笑啦！