【西強東弱】全明星游走西岸，東西岸現最嚴重分化

文：MenClub Mr.波特　　圖：互聯網
POSTED ON 04 Jul 2017


尋日，鷹隊全能核心Paul Millsap確認與金塊簽約，雙方將簽下一份3年9000萬美元合同。Millsap確認轉投金塊後，今年夏天休賽期間已經出現多宗交易及簽約，其中最令人震驚嘅消息包括Paul George被交易至雷霆與Russell Westbrook組成超強二人組，而Jimmy Butler則被送至木狼，與Karl-Anthony Towns以及Andrew Wiggins組成新嘅鐵三角。當然仲有Chris Paul轉投火箭同James Harden組成最強後衛組合之一。

單睇上面4宗大新聞，就可以睇到有3名本來嘅東岸全明星轉戰西岸，其中包括Millsap、George同埋Butler。呢個情況令西岸球星越黎越多，相反東岸就無咩西岸球星轉過去，都有嘅快艇射手J.J. Redick以1年2300萬美元轉投76人囉，佢已經算係最有名氣架啦。

雖然休賽期仲有好一段時間，咩交易都有可能發生，但係就有球迷已經開始拎「西強東弱」呢個情況黎開玩笑了，其中佢地就以今年全明星嘅相片黎講笑，將George、Butler同Millsap都掉去西岸，而東岸呢？就只係得番LeBron James同Kyrie Irving…..

當然，呢個情況係有啲誇張嘅，因為其實東岸都仲有唔少全明星，好似「字母哥」Giannis Antetokounmpo、DeMar DeRozan、John Wall、Isaiah Thomas、Carmelon Anthony、Kyle Lowry等。不過確實相比西岸嘅明星陣容，東岸嘅星味真係被嚴重比下去。

而「西強東弱」另一個引伸出黎嘅問題就係，東岸比賽嘅觀賞性將可能變得更低，經過今年休賽期後，基本上東岸只係得番騎士、塞爾特人、速龍、公鹿同巫師較為吸引，其餘就係天賦極高嘅76人，其他球隊就好似真係要相繼進入重建，可能要等LeBron James退役先有出頭天。

不過，就喺唔少球星過檔西岸之後，東岸將變得更加舒服，球隊之間嘅實力將會更加懸殊，強隊將可以輕易獲得好成績而晉身季後賽，而中游球隊則可能面對西岸時非常吃力，但係就可以以唔算高嘅戰績打入季後賽。就好似西岸經常勝率要有50％先可以進入季後賽，但係東岸就可能只需要40幾％已經可以入到季後賽。

原本岩岩一季東岸係有啲起息的，好似公牛就以勝率50％岩岩以第8種子身份入到季後賽，同西岸8號種子嘅拓荒者勝率係一樣。但係如今情況將好大機會一下子變成嚴重嘅「西強東弱」，除非東岸嘅球員能夠挺身而出，否則來年嘅全明星賽將好可能係一面倒西岸強於東岸了。