講起對抗疫情，絕大部方法都係令人唔開心嘅——戴口罩啦、戴兩個口罩啦、六點後唔畀堂食但係可以返工啦、去被人撩鼻啦、打一針、打兩針、打三針啦，有邊樣嘢大家真係享受做架？但根據美國一個研究發現，原來有啲開心嘢可能都有用，就係大麻——準確啲，係大麻中嘅某啲成份。

圖片：Pexels

美國俄勒岡州立大學一班研究員，日前於《Journal of Nature Producsts》中發表一項研究，指於工業用大麻中搵到嘅「cannabigerolic acid (大麻萜酚酸)」 以及 「cannabidiolic acid (大麻二酚酸)」能有助人體對抗冠狀病毒。研究指於培養皿實驗中，發現上述兩種大麻素能夠黏附於冠狀病毒嘅「刺突蛋白」(即係冠狀病毒表面嗰啲刺) 之上，從而阻止刺突蛋白與人體細胞融合，病原體就冇法進入人體細胞。

值得一提嘅係，所謂嘅「工業用大麻」，即係大家熟知嘅「火麻」，火麻仁就係火麻嘅種子。

圖片：Pexels

但喺你拎起支唔知Roll咗啲咩嘅煙、或者諗住落街狂飲火麻仁之前，要注意呢次研究只係於實驗室、培養皿層面證明大麻素有助對抗冠狀病毒，唔代表當大麻素進入人體後都會有同樣效果。《Fortune》亦引述專家指，過往有無數藥物測試，即使培養皿實驗證實有用，但都因為各種原因無法成為正式藥物。所以今次研究只係起咗個頭，證明大麻素可以係一個方向，要真正成為藥物，仲需要大量人力物力時間金錢去進一步研究。

資料來源：Fortune