如果你覺得今晚介紹呢位「櫻井おとの」好熟口面的話，咁你係啱㗎！事關自佢2021年出道之後，我呢個深夜系列就唔止一次介紹過佢，不過當時嘅佢仲用緊漢字名「櫻井 音乃」。咁點解佢無啦啦要改名呢？就係因為佢離開咗原本嘅經理人公司；點解要離開呢？就係因為舊公司覺得佢嘅寫真銷量唔好！

雖然我之前介紹過好幾次，但其實「櫻井おとの」今年只係23歲。早於中學二年級時佢就成為少女時尚雜誌《Popteen》嘅模特兒，到高中時間更加去參加環球小姐嘅日本區選以及「女子高中小姐」選美，雖然最後兩個都無贏到，但就令佢引起注意，後來仲去拍咗著名嘅戀愛綜藝《今日、好きになりました。》嘅韓國篇。

高中畢業之後佢就正式加入著名經理人公司Horipro，並於同年喺《週刊Playboy》獻出處女寫真，並憑住有前有後嘅S字身材獲得巨大回響，唔單止《週Play》不停搵佢拍新寫真，創下於不足兩年時間登上《週Play》五次嘅紀錄，更於2021年被《FLASH》選為「下一代寫真女王」。歷年黎亦同各大雜誌合作，推出過無數電子寫真，2022年時更推出首本個人寫真集。睇黎發展得非常唔錯。

但到去年1月時，佢就突然宣佈離開Horipro單飛，名字亦改成用假名嘅「櫻井おとの」。後來接受訪問時，佢指離開舊公司係因為「發展方向不一致」，更大爆公司有人狠批佢「過去三年（寫真）都賣唔出，以後都唔會賣得出」而令佢大受打擊，所以決定單飛證明自己。

其實以佢嘅身材外貌，明明就應該係男子最愛嘅類型；過去不停有雜誌寫真邀約，亦證明佢一定有市場，舊公司話佢「賣唔出」的確係難以理解。希望「櫻井おとの」未來會拍更多寫真，賣到盆滿缽滿，剝舊公司棚牙之餘，我哋又有靚相睇，咁咪雙贏囉！

IG：o_to.08