日本女星「永野芽郁」早前因為與田中圭嘅不倫醜聞而令形象大受打擊，或者有唔少Fans都會因為咁而「脫粉」。而如果身為「永野芽郁」Fans嘅你想搵個代替品的話，咁今晚要介紹嘅呢位 新人偶像「夏川いおり」或者就係個好選擇，事關就係因為激似「永野芽郁」而廣為人識！

現年24歲嘅「夏川いおり」出生於日本東京都，去年9月加入SPJ Entertainment旗下嘅偶像女團「イイトコドリ」出道，與號稱繼橋本環奈後第二個「奇跡的一杖」偶像「中川心」係隊友。不過要數到佢本人之所以會紅，就要提到今年4月時佢參加TBS節目「ニンゲン観察バラエティ モニタリング」嘅拍攝。

該節目表面上就係拍攝阿部寬、永野芽郁以及道枝駿佑人生第一次去東京迪士尼玩，但實際上拍攝中途就由同「永野芽郁」生得好似樣嘅「夏川いおり」代替上陣，以惡作劇兩位男星。更奇妙嘅係，哪怕三人一齊玩機動遊戲、而且面對面對話，但兩位男星都無發現唔同咗人。揭露真相之後道枝駿佑仲感嘆「夏川いおり」唔單止個樣似，連把聲都似「永野芽郁」。「夏川いおり」亦憑此一舉成名。

當然「夏川いおり」亦唔係一味靠黐。今年5月時佢就開始參加寫真活動，先係於《週刊Magazine》舉行嘅寫真活動「Young Maga G League」獻出處女寫真作，近來又初次登上另一人氣雜誌《週刊Playboy》。證明自己唔止生得似其他人，仲有屬於自己嘅魅力。相信大家亦可以期待下佢未來嘅作品啦。

IG：natsukawa_iori