唔少藝人都相當著重自己嘅形象，所以行為舉止都儘量符合社會規範，就連感情事都三緘其口，無論係拍拖定分手，唔到被人發現嗰刻都唔會主動提起。但今晚要介紹嘅呢位「二瓶有加」近來就打破呢個慣例，先係登上搞笑節目時，因為頻頻被「屎尿屁」及咸濕笑話逗笑而被稱為「低級笑話愛好者」，最近更自爆被人飛咗添！

現年27歲嘅「二瓶有加」，18歲時曾先後參加Morning娘及AKB48嘅徵選，但前者落榜，後者就只能成為「仮研究生」，見入行無望於是佢就去咗讀大學。但大學即將畢業時，都係覺得自己想入娛樂圈，所以再次參加徵選，並以跳舞組台「PINK CRES.」出道，直到2021年退團。

但要數到佢嘅代表作，就一定係今年5月時佢登上日本搞笑藝人「佐久間宣行」嘅YouTube「佐久間宣行のNOBROCK TV」，挑戰「含奶忍笑」環節。結果佢就被搞笑組合「どぶろっく」嘅低級笑話頻頻逗笑，影片更突破千萬次觀看，成為頻道最多觀看嘅影片，亦令其人氣大升。

由於反應太好，所以頻道近日又請返「二瓶有加」做嘉賓，佢指出上集節目出街後，大家都真係以為佢「低級笑話愛好者」，所以好多人都不停DM騷擾佢，今次佢上去就係希望挑戰成功，搣甩「低級笑話愛好者」嘅污名，結果再次挑戰失敗。節目後半段，佢就要挑戰一邊觀看搞笑藝人表演一邊喊，點知佢就突然自爆近日被人飛咗，好傷心一定喊得出。結果佢亦真係挑戰成功。

接連登上節目令佢人氣急升，近來更首次為《週刊Playboy》拍攝寫真，只見平時愛著針織衫嘅佢，其實都算有前有後、玲瓏浮突呀，點解會被人飛嘅呢？

IG：niheiyuka.official