每年夏天，大家嘅IG上面都會見到唔少靚女去曬太陽、去遊船河諸如此類。但有趣嘅係一眾女生們熱愛「同陽光玩遊戲」嘅同時，又好驚自己曬黑。相比之下，今晚要同大家介紹嘅呢位「白波瀬海来」就大方得多，因為佢自17歲出道以黎，一直都以健康體型及陽光膚色示人，展現另一種魅力。

現年25歲嘅「白波瀬海来」出生於日本千葉縣，2014年仲讀緊高中時，就因為登上《千葉美少女図鑑》而被經理人公司留意到，隨即簽約加入藝能界，翌年就已經有機會出演電影。由於佢由小學開始就已經係一名游水運動員，每日都要去泳會練水，所以出道時膚色就已經偏向健康。後來佢更加愛上「Bodyboarding (一種趴喺塊板到嘅滑浪)」，膚色就越見黝黑，就連近年嘅寫真大部份都係於海邊拍攝，睇相都Feel到陣暖意湧出黎。

而且你唔好以為佢滑浪只係玩玩下，事關佢於2019年時曾參加日本滑浪聯盟 (NSA) 舉行嘅全國比賽，獲得女子組嘅第二名；同年更曾於千葉縣嘅海邊，救助一位遇溺嘅男性滑浪者，得到當地警察表揚。真真正正嘅有實力、有美貌、有善心！

IG：kyra.97