雖然話飲酒呢家嘢冇分男女，但感覺上女仔都會偏向鍾意紅白酒、雞尾酒，而啤酒就係麻甩佬們嘅最愛，甚至如果香港女仔鍾意飲啤酒就會被稱為「麻甩系女子」。而今晚要介紹嘅呢位「谷 かえ」就唔單單係鍾意飲啤酒嘅「麻甩系女子」咁簡單，佢嘅酒量，分分鐘劈贏幾個大男人！

現年25歲嘅「谷 かえ」，最早於2019年就於青少年雜誌《Young Champion》水著出道，同年佢更一口氣推出三隻寫真DVD，成績算係相當唔錯。不過之後佢就將事業重心放喺電視及網上節目，幾乎絕跡於寫真界。直到2022年先再次推出寫真DVD，並開始參加各大攝影會，今年初亦推出首本個人寫真，似乎有意於寫真界大展拳腳。

你唔好睇「谷かえ」好似細細粒，個樣又生得可可愛愛咁，就以為佢係個柔弱小女生，事實上佢嘅嗜好比起唔少男人都更「男人」，賭錢、Poker、飛鏢以及柏青哥瓣瓣都啱，當中尤其鍾意飲啤酒。佢曾經於一個訪問中表示，如果第二日唔需要工作嘅話，佢一晚可以飲到廿罐啤酒，而且仲會溝埋清酒、紅酒、燒酎一齊飲，酒量相當驚人。飲咁多佢仲可以Keep到咁Fit，抵佢做到寫真女優嘅！

IG：tani_kae