熱愛葡萄酒嘅飲家都知道，酒液嘅世界入面，酒香甚至比味道更重要。人類嗅覺分辨到嘅味道，比味蕾還要多，所以聞香動作係飲酒最基本，亦係最關鍵嘅一步。為咗令各類葡萄酒香味揮發得更徹底，設計師們紛紛推出唔同形狀嘅酒杯；杯肚大細、酒杯高度、杯口闊度，每一個細節都有其心思。最近Kickstarter就有隻新杯，引起酒界一輪熱烈討論，事關呢隻Wine Glass Mask將隻杯整到成個氧氣罩咁，同傳統酒杯好唔同。

葡萄酒香可以好複雜，果香、香料、皮革、煙草、花香、草本、朱古力等等味道，都係靠空氣傳送，而Wine Glass Mask嘅理念，就係盡量控制你聞香時嘅空氣流動。酒杯有個Venturi嘅設計，當你吸氣嗰時會增加空氣嘅Velocity，從而帶動更多紅酒香氣嘅粒子去到你個鼻度，咁你就可以感受到更豐富嘅香味啦。如果你覺得有啲複雜，可以想像一吓，手拎住條水喉然後喺中間施壓，啲水就會更快地 「咇」 出嚟，呢個就係Venturi啦。

Wine Glass Mask嘅創辦人聲稱，而家啲酒杯大多都係圓口，只係因為比較容易生產，不過人類嘅口鼻又點會係一個圓形Fit到呢? 故此，佢地嘅杯口係照返人體面形塑造，簡單啲講，就係平時幫你呼吸嗰啲氧氣罩咁款。

坦白講，靚就唔係好靚架啦！但科學上好似解釋得幾有道理，Early Bird優惠$15美金隻都唔算貴，飲家們可以買隻返嚟玩吓，睇吓個Venturi係咪對聞香咁有幫助！預計本年度嘅6月發貨，但玩得多Kickstarter都知，延遲係時有發生的事，好嘢係需要耐心等待嘅。

Source : Kickstarter