酒、車、錶堪稱男人至愛，無論對幾耐，要花幾多錢，幾多心機都樂此不疲，試問世間上有邊一段真摰愛情可以比得上呢啲男人玩具? 呢幾個界別，時不時就會有Crossover推出，叫班Fans睇得如痴如醉，其中最經典，莫過於Hublot同埋Ferrari嘅Big Bang系列腕錶，上次隻MP-05 LAFERRARI嘅宣傳片，真係可以稱為Car / Watch Porn，有型之極，非筆墨能夠形容。

2011年Hublot推出第一批Ferrari合作腕錶，直至上年年底，佢地一次出多3款Hublot Big Bang UNICO Ferrari Collection，從鈦金屬、黑碳，到Rose Gold奢華版本都有，3款一樣咁型棍之餘亦別具特色。先從錶盤講起，經過重新設計，3點鐘位置一個參考法拉利嘅獨特轉速錶，置於腕錶之上化身成一個集成之日期指示器、60分鐘計時盤。6點鐘一個鮮明嘅法拉利標誌，跑車迷見到必定心心眼。

Hublot自家製UNICO機械機芯，具飛返計時功能，4Hz振頻，提供72小時嘅動力儲存。錶殼尺吋為45mm，錶冠保留咗上代嘅鎖定系統，而新版本嘅推桿就置入錶殼之中，隱瞞性更高。3款限量版，鈦金屬限量1,000隻，售價約20萬港幣；500隻黑碳版，售價約22萬港元；最後嘅18K Rose Gold，都係限500隻，賣大約33萬港幣。