唔知大家記唔記得當年《大人之科學》曾經出過星象儀，可以喺室內投射出奪目嘅星辰圖案，講真係幾浪漫嘅。不過呢啲手作嘢，至少都玩你幾個鐘，仲要好易砌得唔好，巴打們貴人事忙，直接買一個現成嘅仲好啦。韓國設計師Jay Hyun Kim出咗一個Cosmos時鐘，個圓形盤面會隨時間推移，好似星空慢慢移動咁，同星象儀一樣咁靚!

Cosmos嘅盤面佈滿繁星，大家俾啲想像力，好易聯想到各個星宿，而其中有兩粒比較顯眼嘅大星就係小時、分鐘顯示。較細嗰粒分鐘星星會走盤面外圍，即使去到10時10分呢啲位都唔會重疊。雖然無時間刻度，但閱讀時間嚟講並不算太困難，畢竟呢啲設計嘅係要講想像力嘅。

Cosmos仲有啲高科技功能，可以調較光度，仲可以透過藍芽連接電話，瞬間化身成一個小型Speaker。喺夜晚望住星空慢慢移動，再聽住Olivia Ong嘅Bossa Nova；噢，呢個時候點可以忘記一杯優雅嘅Burgundy Wine呢?

Source : Yanko Design