2015年4月，Tiffany & Co.嘅長方形腕錶East West首度登場，充滿驚喜嘅方形錶盤，既特別亦頗有典雅味道，不過當時呢隻錶美中不足嘅地方有兩個 : 一、腕錶以瑞士石英機芯驅動；二、腕錶尺吋只有42X25 mm，男士配戴的話，可能會覺得唔夠Masculine。

今年Tiffany再次推出新版，改用自動上鏈機械機芯，放大埋錶盤尺吋，一次滿足市場兩個願望，如此從善如流，怪不得人人讚好。

新版Tiffany East West Automatic 3-Hand，保留咗典雅嘅長方形設計，但盤面就多咗Automatic呢個字樣，同3-Hand大三針。新版機芯TCO 2558 movement係改良自Sellita SW1000自動機芯，搭載於腕錶上提供到40小時動力儲存，今次我地可以喺錶底細心欣賞美妙嘅機芯運作，「機械美」，而家已經係高級腕錶嘅必備標準之一。

錶盤size放大至46.5X27.5，男士戴於手上更加有氣派，極盡優雅都唔會太過陰柔。原版錶盤使用平滑、淨色背景，新版則加上Guilloché Finishing，放射線狀嘅斜紋令錶盤視覺上更巨大同搶眼，一樣係回應緊近年男裝錶市場「愈大愈好」嘅需求。除咗藍面藍帶、白面黑帶之外，新Automatic仲加咗18k玫瑰金嘅奢華版，俾高級腕錶嘅愛好者有多一個選擇。