唔係吹水，呢隻Tag Heuer Connected真係可以換返機械錶，但捨唔捨得換就係另一回事啦。智能手錶而家漸漸同傳統腕錶融合，講外觀上嘅分別愈嚟愈細，採用嘅質料亦相差無幾，例如貴價錶常用嘅玫瑰金，而家出現喺 Smart Watch 之上，一啲都唔出奇。

隻 Tag Heuer Connected，由Inter、Google同錶廠3方聯手研發，新版只係用返玫瑰金，功能上雖然同舊版無分別，但確實貴氣咗10倍。直徑46mm，內置 4GB 記憶體，採用咗新一代鋰電池，可以撐足一整日。腕錶入面有 mic，俾你輕鬆玩 Google Voice Command，錶面係藍寶石玻璃Touch Screen，主要控制鍵設於3點鐘位置。

Connected 可以同 Android 4.3 或者 iOS 8.2 以上版本嘅手機同步，你唔係用3310都基本上唔需要擔心。電子錶都落得水嘅，IP67級防水功能，生活上問題不大，但擺落火鍋度打邊爐嘅行為就後果自負啦。

同 Tag Heuer 其他錶一樣，Connected 都係有兩年固保，當固保期完結嗰陣，你可以去品牌專門店嗰度，換一隻瑞士製Carrera Calibre 5機械錶，隻錶以2級鈦金屬製，同 Connected 有相同設計。呢隻豪華版 Connected，港幣定價為 HK$78,000。