太空迷應該 J 到一地都係啦，話哂係真‧太空隕石錶喎。Grey Side of the Moon個錶面係由實心嘅外太空石製成，錶廠採用咗史前遠古墜落到納米比亞 (Namibia) 嘅吉丙隕石 (Gibeon meteorite)。

呢種屬於鐵隕石嘅質料，經過酸蝕後都會呈現帶狀斑點，設計師又叫佢地做維德曼交角圖案(Widmanstätten Pattern)，而Grey Side of the Moon都表現出呢種隕石嘅風貌，由於使用咗天然材料，所以每隻錶個花紋都係獨一無二嘅。

錶殼，採用咗Omega專利嘅Ceragold裝飾技術，可以將18K金同陶瓷部件二合為一，營造出流麗順滑嘅效果。灰色陶瓷表殼、置有氮化矽環嘅18K Sedna金錶圈、磨砂小時刻度、指針都用咗18K Sedna 紅金，而錶圈上面嘅測速計就係 Ceragold 技術嘅示範啦。

摺疊扣配搭灰色皮革錶帶，繼續充滿太空科幻感，而機芯則用自家9300同軸機芯，同軸嘅計時時分針、三層式導柱輪，自動上鍊，都係大家熟悉嘅名作啦。