自1970年美國太空總署為表揚Omega對太空任務嘅貢獻，向品牌頒發「Snoopy Award」之後，每隔一段時間Omega都會推出「Snoopy Award」特別版限量腕錶，其中2015年出嘅第二代更加係炒到廿幾三十萬。不過去到最新出嘅第三代，炒價就應該不復存在——唔係話隻錶冇收藏價值，而係因為佢終於唔係限量發售！

Omega Speedmaster Silver Snoopy Award採用藍白配色，藍色陶瓷錶圈、銀製錶盤再加42mm不鏽鋼錶殼，整體明亮簡潔。九點小錶盤上嘅Snoopy公仔亦見童趣。不過隻錶嘅最大賣點，其實喺個錶底到。反轉隻錶你會見到佔大半個錶底嘅月球及遠景嘅地球，再加上乘坐住阿波羅任務「Command and Service Module」嘅Snoopy，本身已經相當悅目。但更神奇嘅係地球圖案其係係小秒針盤，每一分鐘自轉一圈；而坐住飛船嘅Snoopy就會因應計時功能而繞月飛行，比起個錶面更令人著迷。你又叫人點忍心戴上手遮住佢呢？