一般黎講，大家都會覺得年輕人血氣方剛，只要孤男寡女共處一室就好易情欲高漲——唔係政府都唔會叫大家去打羽毛球啦係咪？不過早前一個外國研究就似乎證明所謂「Z世代」嘅年輕人並無大家想像中咁「亂」：佢哋唔單止係眾多年齡層中單身率最高，而且做愛次數亦同老年人一樣咁低，甚至佢哋仲係最支持一夫一妻制嘅組別添！

過去我哋曾多次引述過嘅美國印第安納州大學社會心理學研究人員Dr. Justin Lehmiller，早前於交友App「Feeld」合作，進行咗一個探討「Z世代」（1997至2012年出生）兩性生活嘅大型調查。調查搵黎3,310名來自71個國家、年齡屆乎18至75歲嘅「Feeld」用家，並詢問佢哋對於性愛及兩性關係嘅態度、行為及經驗。當中就包括「過去一個月做過幾多次愛」等問題。

結果就發現，Z世代過去一個月嘅平均做愛次數僅約為3次，同1946至1964年出生、做得Z世代阿爺嘅「嬰兒潮人口」一樣。反觀Z世代嘅老豆輩（1965至1980年出生嘅X世代）以及佢哋嘅哥哥輩（1981至1996年出生嘅千禧世代），過去一個月平均做愛次五次。可見呢班廿尾到五十尾嘅成年人先係「做愛主力」。

同一時間，調查亦發現有高達一半Z世代報稱目前單身，遠高於不約而同地都係得1/5人單身嘅其他年齡組別。有人可能會話：啲後生淨係搞嘢唔拍拖架嘛，咪單身囉。但調查亦發現，Z世代支持一夫一妻制嘅佔比，係其他年齡組別嘅兩倍，換言之年輕人喺道德上比其他人更站得住腳。研究人員推測，年輕人支持一夫一妻制嘅原因，好可能係佢哋入世未深、感情經驗未夠豐富，所以唔會如成年人一樣發現一夫一妻制唔適合自己，又或希望尋求新嘅刺激。

資料來源：New York Post、The state of dating report: How Gen Z is transforming sexuality and relationships