對於男性嘅不忠行為，進化行為學家提出嘅其中一個解釋，就係男性（作為一個物種）擁有更多性伴侶的話，就更容易將自己嘅基因傳播出去。但對於基因傳播受限於自身懷孕週期嘅女性而言，類似嘅假說卻不能解釋佢哋嘅不忠行為。對此，學者提出另一個名為「雙伴侶策略」嘅假說，並於近來公佈嘅研究中搵到支持假說嘅證據，同時揭露男女不忠行為背後嘅複雜動機。

所謂嘅「雙伴侶策略（Dual-mating strategy）」係指某啲女性會認為「擁有最好基因嘅男性」與「最能夠照顧小朋友嘅男性」並唔係同一個人，所以對佢哋而言，最好嘅繁殖策略會係「與『好爸爸』結立長久關係，再去外面收集『好基因』，再返去搵『好爸爸』哺育下一代」。

為咗研究呢個假說，來自澳洲墨爾本大學嘅博士生Macken Murphy早前做咗個研究，並於科學期刊《Evolution and Human Behavior》公開。研究搵黎來自19個國家、共254名曾經有不忠行為嘅異性戀男女，並要求佢哋以「外表」、「個人」、「育兒」三個層面去為原伴侶以及不忠對象評分。結果發現，平均而言女性會認為不忠對象嘅外表評分（比起原對象）更高，但同時「育兒」評分則較低。換言之女性的確認為不忠對象擁有較好嘅基因，但不適合共同育兒，與「雙伴侶策略」假說吻合。

但各位男士唔好笑住，事關同一個研究發現男性亦有一模一樣嘅行為，換言之「雙伴侶策略」假說一樣可以解釋男性不忠行為。不論男女都係咁高咁大㗎咋。

除咗上述嘅評分外，是次研究仲以訪問方式了解受訪者嘅不忠原因，結果就發現不忠行為背後其實有非常複雜嘅動機。例如有人係為咗追求新鮮感；有人（特別係女性）就係因為對原關係有所不滿而向外尋求補足；有人為咗證明自己嘅吸引力而不忠；又有人係為咗報復有不忠行為嘅對象而不忠。另外亦有人提到「騎牛搵馬」、「個人原因」（如與原對象處於遠距離關係，酒精或藥物影響等）。研究指出不忠行為受一系列內在及外在因素影響，進化行為只係其中一環而已。

資料來源：Why women cheat: testing evolutionary hypotheses for female infidelity in a multinational sample