全球人口老化問題嚴重，相信大家都略有耳聞。而人口老化問題背後，當然就係近年一眾已發展國家嘅年輕人越黎越唔想生仔。例如去年美國密西根州就有個研究，顯示當地有超過五份一居都冇、亦唔打算有下一代。而近日一個衍生研究除咗進一步確認相關數據外，仲打破埋「依家唔生仔老咗你就後悔」嘅傳統思想。

話說去年夏天，有研究推算超過170萬密西根州居民都計劃過「孩子自由 (Child-Free)」生活，即目前冇，未來亦唔打算生、過繼、或領養任何孩子。而密西根大學公共政策及社會研究學院隨即進行一個跟進研究，仔細挑選出1,000名能夠代表整個州份人口構成嘅新受訪者，希望驗證早前研究嘅真偽。結果就發現，雖然已成父母嘅人佔當中52.79%，但完全唔打算有小朋友嘅人亦佔20.94%，大幅超出「依家未有，將來計劃有」、「希望有但不能夠」等其他組別。而如果按此比例推算，即整個密西根中有約160萬人唔打算有小朋友，與之前研究相符。

不過，研究中最值得注意嘅，或者就係破除「唔生仔將來會後悔」嘅傳統思想。研究負責人Jennifer Watling Neal表示：「唔打算生仔嘅人，特別係女性，經常會被告知唔生仔生活唔滿足、將來會後悔。而於今次研究中，我哋就詢問咗70歲以上嘅人有幾想改變佢哋嘅生活，亦即，佢哋對自己嘅人生走向有否後悔。結果發現父母同『孩子自由』組別之間基本上冇分別。亦即代表『孩子自由』嘅人，生活滿足度與其他人相仿，亦唔會特別為生活感到後悔。」

資料來源：Prevalence, age of decision, and interpersonal warmth judgements of childfree adults: Replication and extensions