雖然話愛情應該係「講心唔講金」，但相信大家都知道現代女性非常著重另一半嘅收入高低。例如近日一個日本戀愛結婚網站就進行咗個年度調查，發現有過半女性都希望搵一個收入比自己嘅男性——但你又唔好以為日本女仔好貪錢喎，因為仔細睇埋其他數據，你就會發現日本女性眼中嘅「高收入」，實際上唔係好高架咋！

兩性對另一半嘅收入要求 (上至下為：比自己低、同自己一樣、比自己高)

兩性設定嘅年收入條件

日本網站「出会いコンパス」早前搵黎709名有使用交友軟件習慣、年齡介乎20-49歲嘅男女，並分析佢哋於交友軟件中設定嘅擇偶條件。結果發現，有51.7%女性都希望另一半嘅收入比自己高，另外有34.1%女性希望另一半收入同自己差唔多。反觀男性主要希望對方收入同自己差唔多 (56.3%)，其次為比自己低 (34.7%)，希望女方收入比自己高嘅男性僅佔8%。

但如果仔細睇日本女性要求嘅收入數字，你就會發現佢哋嘅要求唔算高。研究發現有3.8%女性認為另一半收入不足300萬Yen都可以接受，希望對方年收300-400萬Yen嘅女性有19%，另有25.5%日本女性認為400-500萬Yen就已經足夠。亦即係話只要男性年收達到500萬Yen，就已經能夠滿足近半 (48.3%) 日本女性。而年收500萬Yen其實只係約HK$26萬左右，即係月薪兩萬出頭；根據2021年日本國稅局民間薪資調查，日本人入息中位數亦係443萬Yen。換言之近半日本女性，其實只係希望另一半有「平均水準收入」。如果收入達到700萬Yen (HK$38萬，即月薪3萬出頭)，更已經能夠滿足近80%女性嘅擇偶條件。

遇到收入比自己要求低嘅人時嘅反應 (上至下：唔覆、點都會覆、確認其他條件)

年收入以外嘅條件

研究同時發現，即便遇上收入不如自己嘅男性，大部份日本女性都唔會即刻「落閘」。有近半女性 (46.2%) 指，如果於交友軟體中與一名收入不如自己嘅男生配對，佢哋會嘗試了解男性嘅其他條件；而有25.4%女性就指無論對方收入如何，都一定會回覆對方。只有28.4%表示唔會回覆收入比自己條件低嘅男性。

而除收入以外，調查中女性最睇重嘅其他條件為「外貌及打扮」，佔超過50%，其次為「年齡」、「有冇子女」及「吸煙與否」。但你唔好話啲女仔睇樣好膚淺呀，因為男性睇樣嘅比例係大幅拋離女性，接近70%架！

結論就係，日本女性雖然對另一半嘅收入有所要求，但其實佢哋只係希望對方收入「唔好過低」，並唔係要咩大富大貴。而且即使收入稍遜，大部份日本女性都願意了解男性嘅其他特質。

資料來源：maidonanews