自從AI圖片生成技術流行後，唔少用家利用黎進行各種有趣嘅企劃。例如有人會將動漫角色真人化，又有人好畀心機整出明星樣嘅清涼圖。近日Reddit上就出現一個名為「各國家平均顏值素顏女性」嘅帖文，雖然睇落去非常正常，但留言處就充滿網民嘅吐糟！

瑞典

德國

墨西哥

日本

意大利

話說本月初時，Reddit用家「_kevx_91」於AI圖像生成工具「Midjourney」嘅討論版面中，上傳咗一系列佢自己整嘅「各國平均顏值素顏女性」圖。顧名思義，呢組圖本來就應該展示AI認為嘅「平均顏值」而且「素顏」嘅女仔，但唔少網民睇完之後都表示「圖文不符」。當中大量人投訴呢班女仔根本就係「平均以上」，甚至可以稱為「平均靚女」、「平均模特兒」樣貌，完全於現實中嘅平均樣貌脫節。

另外「素顏」一項亦被大量網民投訴。唔少人都表示圖中嘅女仔明明就係有化妝，面上幾乎毫無瑕疵；亦有人提出大部國家嘅平均女性年齡都接近40歲，圖中呢班女仔明顯太後生。

巴西

哥倫比亞

英國

加拿大

美國

而喺一片吐糟聲中，有網民就畀出較為仔細嘅分析。網民「TheBirminghamBear」指出，如Midjourney呢類AI圖像生成工具，其實係會按機率去回應用家輸入嘅「提示詞 (prompt)」。例如，雖然墨西哥女性嘅平均體重比起美國要高，但因為「痴肥」嘅話題於美國被討論得更多，令「肥」與「美國女性」之間嘅關係變大，所以輸入「平均美國女性」時，系統就會有更高機率生成一個較肥嘅女性。

同樣道理，由於靚人被討論嘅機率更高，所以AI認知嘅「平均」就會大幅向「靚」嗰邊靠攏，亦係點解絕大部份AI生成人像嘅顏值都偏高；而網上大部份聲稱「素顏」嘅相其實都有化妝或P圖，結果同樣會「誤導」AI理解何謂「素顏」。某程度上亦暴露出目前AI技術嘅不足之處。

資料來源：Reddit