身高素來都係兩性選擇另一半時嘅重要條件，其中女睇男嘅標準相當簡單，就係無論佢本人係米四定米七，佢都要搵個米八嘅男仔。但男仔睇女仔嘅身高就複雜得多，除咗睇佢本人嘅身高之外，據一個最新研究指，原來仲視乎男生係想拍長拖定拍短拖，因為想拍短拖嘅男人，係會偏好較矮小嘅女性。

卻說以英國Sussex大學及波蘭Wroclaw大學研究員Katarzyna Pisanski為首嘅一個歐美團隊，於加拿大、古巴、挪威及美國招募咗536名來自城市及鄉村嘅男女，試圖證實「選型擇偶偏好 (即高嘅人會偏好高嘅另一半，反之亦然)」會因受訪者希望得到長期或短期關係而有所改變。佢哋要求受訪者於一系列不同身高嘅異性背面簡筆畫中，選出自己佢哋認為最適合長期及短期關係嘅另一半身高。

結果發現，四個國家嘅男性，平均而言偏好164-167cm嘅女性，而女性們就偏好179-180cm嘅男性，睇落就係非常理想嘅身高差。不過研究團隊表示，不同國家女性嘅「偏好男士身高」，平均都比各自國家嘅男性平均身高高2.3cm，而男性嘅「偏好女性身高」就比各國嘅女性平均身高矮2.5cm，換言之男女對於另一半嘅身高偏好，其實係各走極端。

更重要嘅係，研究發現本身較高嘅男性，喺考慮短期關係時，其實係會偏好更矮小嘅女生，而考慮長期關係時，就會偏好較高嘅女仔。亦即考量長期關係時，男性更看重「與自己嘅相似性」，但短期關係時就冇咁著重。反向推論，就即係當一個高嘅男仔同一個較矮嘅女仔一齊時，佢可能更傾向視呢段關係為「短拖」而非「長拖」。

資料來源：Assortative mate preferences for height across short-term and long-term relationship contexts in a cross-cultural sample