相信大家瀏覽成人網站時，一定有見過「未滿18歲不得內進」嘅警告，而且就算當年你未夠18歲，你都一定係撳「已滿18歲」嗰個掣。不過未來大家上成人網站時，就可能冇咁容易，甚至要好似依家做網上交易咁，要收一個驗證碼。

卻說法國政府一直希望限制青少年過早接觸成人內容，所以早年佢就先後嘗試立法、將Pornhub等公司告上法庭等方法，但全部都因為私隱、技術等限制而失敗。而據法國數位發展部部長Jean-Noel Barrot近日向當地傳媒透露，法國政府可能會於今年推出新嘅年齡驗證方法。具體黎講，就係佢哋會推出一個手機App，而用家每次想上成人網站，就要透過呢個App拎一個驗證碼，再輸入返去個網站到先可以瀏覽內容。換言之同大家目前做網上交易，要收一個由銀行發出嘅驗證碼非常類似。

據報法國青少年瀏覽成人內容嘅問題非常嚴重，早前一個當地調查發現，15歲或以下嘅青少年中，有超過3份2都曾經接觸過成人電影等內容。另一邊廂，近年法國嘅成人電影業亦捲入多宗性侵醜聞。順帶一提，法國嘅合法性交年齡亦為15歲。