性愛素來係伴侶維持幸福關係重要因素之一，但情侶或夫妻一齊得耐咗之後，往往就會因為各種原因而減少性愛次數，甚至進一步影響大家嘅關係。咁作為男性，又可以做啲咩去打破呢個困局呢？根據一個最新研究，方法其實好簡單，「做多啲家務」！

圖片：《家有囍事》

首先，各位男士要注意，個研究就唔係話我哋做家務會令老婆/女友覺得我哋好性感，所以提升性慾；而係話當女伴覺得屋企嘅家務分配唔公平時，佢哋嘅性慾就會減低。

來自澳洲墨爾本大學心理科學系嘅Emily Harris早前帶領團隊進行咗一個研究，搵黎706名「與一名男性有六個月以上穩定關係，而且育有一名12歲或以下小孩」嘅美國或西歐女性，並要求佢哋就個人性慾、屋企內嘅家務分配、佢哋覺得呢個分配有幾公平等回答一系列問卷。結果就發現，如果屋企入面嘅家務分配不平等，女性對於男伴嘅性慾就會大幅降低。

圖片：《家有囍事》

Emily Harris指出，表示自己比起男伴負責更多家務嘅女性，會傾向將男伴當成係需要被照顧嘅「受養人」而非伴侶，令佢哋對於自身作為「老婆」定「媽媽」嘅角色感到模糊。簡單啲黎講，就係你做得唔夠多家務，你老婆就會當咗你係佢個仔，而好少有人會對個仔有性慾，於是佢對你嘅性慾就會大幅下降。

特別要留意嘅係，呢個研究中講緊嘅「公平分配家務」，係指「屋企有10樣家務，你做5樣，我做5樣」嗰種絕對公平，而唔係女性「個人覺得有幾公平」，所以只要男性負責返自己喺屋企嘅本份，哪怕只係做最輕鬆嘅家務，就已經有機會改變女伴對於你嘅睇法，從而提升對方嘅性慾。

資料來源：Gender Inequities in Household Labor Predict Lower Sexual Desire in Women Partnered with Men