有研究指出，大家對於人嘅第一印象其實於雙方見面嘅頭幾秒就已經完成，(簡單黎講即係主要靠外觀)，而第一印象又好大程度影響你往後對呢個人嘅觀感，換言之你嘅外觀對於建立關係其實非常重要。近日就有個研究發現，原來單單體型一項，就已經會影響對方認為你希望認真拍拖，定係搵SP食散餐。

美國Arkansas大學社會認知與人類進化研究實驗室 (Social Perception and Human Evolution Research Lab) 嘅研究員Mitch Brown日前公開一個研究，指出一個人嘅體脂肪高低，甚至只係視覺上體脂肪嘅高低，就已經會影響他人對你想認真拍拖定食散餐嘅觀。

Mitch Brown搵黎295名男女大學生，並要求佢哋觀看由電腦自動產生，分別為「體脂肪高但大隻 (大胸)」、「體脂肪低但大隻 (大胸)」、「體脂肪高但瘦小 (平胸)」、「體脂肪低但瘦小 (平胸)」嘅男女人像各四張，再要求大學生紀錄，佢哋覺得每個人像對於長期關係或短期關係感興趣嘅程度，從而得知兩者嘅關係。

結果發現，男性大學生們普遍認為大胸嘅女仔，比起瘦 (平胸) 嘅女仔更傾向對短期關係有興趣，同時男女大學生都認為大隻仔更傾向對短期關係有興趣。同時研究亦發現，男女大學生都認為體脂肪高男女更傾向對長期關係感興趣，特別係女大學生認為「體脂肪高」與「長期關係」有更強關係。

Mitch Brown指出，呢個關係可能係同「短期關係成功率」有關。佢話「大隻」或「大胸」對男女都有吸引力，於是大學生們就會認為對方更傾向對短期關係感興趣；反之大學生們認為「體脂肪高」能夠獲得短期關係嘅機率本身就較低，所以認為對方會對長期關係更感興趣。

資料來源：Psy Post